Justisa liuhosi siénsia.
Ho onra aas no sentidu responsabilidade institusionál, iha okaziaun aniversáriu nú. 12 hosi Polísia Sientífika no Investigasaun Kriminál — PSIK, ne'ebé selebra iha loron 14 fulan Maiu 2026, ami aprezenta ba públiku website institusionál foun PSIK nian, disponivel iha pcic.gov.tl.
Lansamentu plataforma dijitál ida-ne'e reprezenta marku relevante ida iha prosesu modernizasaun institusionál PSIK nian no reflete kompromisu permanente hosi forsa polísia ne'e ho transparénsia, prosimidade ho sidadaun, kooperasaun inter-institusionál, no hametin justisa no seguransa nasionál.
PSIK, hanesan órgaun polísia kriminál espesializadu, iha misaun atu tulun autoridade judisiária sira iha prevensaun, detesaun, no investigasaun ba krime grave, kompleksu, organizadu no transnasionál, no mós atu garante sentralizasaun no tratamentu hosi informasaun kriminál no polísia iha ámbitu nasionál, tuir legalidade demokrátika, direitu fundamentál sidadaun sira-nian, no prinsípiu sira Estadu Direitu nian.
Website foun ne'e konstitui odamatan dijitál loloos ba asesu instituisaun nian, ne'ebé permite sidadaun sira, entidade públika sira, parseiru nasionál no internasionál sira, no sosiedade jerál atu koñese di'ak liu misaun, vizaun, valór sira, estrutura orgánika, área espesializasaun, no servisu sira ne'ebé PSIK disponibiliza.
Plataforma ne'e dezeña ho identidade institusionál ne'ebé klaru, navegasaun simples, seguru no asesivel, no disponivel iha lian Portugés, Tetun no Inglés, hodi garante komunikasaun ne'ebé luan liu, inkluzivu no efetivu ho sidadaun Timor-Leste no parseiru internasionál sira hosi kooperasaun polísia nian.
Relevánsia partikulár merese disponibilizasaun ba liña denúnsia anónima, ne'ebé dezeña hanesan kanál ne'ebé seguru ba komunikasaun entre sidadaun no PSIK, ne'ebé permite submisaun ba informasaun relevante ba investigasaun kriminál, ho salvagarda hosi konfidensialidade, protesaun ba identidade denunsiante nian no respeitu ba prinsípiu legál sira ne'ebé aplika. Kolaborasaun responsavel hosi sidadaun sira konstitui instrumentu esensiál ida ba prevensaun no represaun krime nian no ba konsolidasaun hosi kultura seguransa públika nian.
Website PSIK nian sei mós sai hanesan espasu komunikasaun institusionál, liuhosi ne'ebé sei divulga notísia, komunikadu ofisiál, informasaun ho interese públiku, konteúdu sensibilizasaun no elementu sira seluk ne'ebé útil ba hametin konfiansa entre instituisaun no komunidade.
Importante atu sublinha katak lansamentu ida-ne'e konstitui de'it pontu hahú ba prosesu evolutivu ida. Plataforma sei hadi'a progresivu, ho integrasaun konteúdu foun, funsionalidade dijitál, materiál informativu, área imprensa, biblioteka lejislasaun, pergunta sira ne'ebé husu beibeik, no servisu sira seluk orienta ba sidadaun.
PSIK fó hatene ninia rekoñesimentu ba apoiu ne'ebé fornese iha ámbitu Timor-Leste Police Development Program — TLPDP, ne'ebé nia kolaborasaun kontribui ba implementasaun hosi projetu modernizasaun dijitál ida-ne'e no ba fortalesimentu hosi kapasidade institusionál Polísia Sientífika no Investigasaun Kriminál nian.
Iha kapítulu dijitál foun ne'e, ami afirma fali kompromisu PSIK nian ho investigasaun kriminál ne'ebé rigorozu, sientífiku, independente, imparsiál, no orienta ba lia-loos materiál, iha servisu ba justisa, seguransa nasionál, no protesaun ba sidadaun sira.
Ba sidadaun hotu-hotu, instituisaun públika sira, parseiru kooperasaun sira, no membru PSIK sira, ha'u hatudu liafuan apresiasaun no konfiansa nian. Justisa hametin ho siénsia, integridade, responsabilidade no kooperasaun.