Polísia Sientífika Investigasaun Kriminál
Polísia Sientífika ba Investigasaun Kriminál (PSIK) hanesan instituisaun Estadu timoroan ne'ebé tau matan hosi Ministériu Justisa, ne'ebé iha autonomia administrativa, finanseira no patrimoniál. Kria hosi Dekretu-Lei No. 15/2014, loron 14 fulan Maiu nian, PSIK konstitui órgaun auxiliár prinsipál hosi administrasaun justisa iha matéria sira investigasaun kriminál nian, ne'ebé hala'o serbisu ho fiskalizasaun funsionál hosi Ministériu Públiku no tuir Konstituisaun no legalidade demokrátika.
Ho baze iha Díli no ho jurisdisaun iha teritóriu nasionál tomak - inklui Rejiaun Administrativa Espesiál Oécussi Ambeno, illa Ataúro no illa Jaco - PSIK responsável ba prevensaun, detesaun no investigasaun ba krime grave, kompleksu no organizadu, garante mós sentralizasaun nasionál ba informasaun kriminál no kooperasaun internasionál polísia nian liuhosi Departamentu Interpol nian.
Misaun PSIK nian mak atu tulun autoridade judisiária sira, dezenvolve no promove asaun sira ba prevensaun, detesaun no investigasaun ne'ebé nia iha kompeténsia ka hetan kompeténsia hosi autoridade judisiál kompetente sira, no mós garante sentralizasaun ba informasaun kriminál no nia koordenasaun operasionál no kooperasaun ho polísia internasionál. Instituisaun ne'e atua eskluzivu atu defende sosiedade, no tuir legalidade demokrátika, no iha respeitu ba sidadaun sira-nia direitu.
Atu hetan rekoñesimentu nu'udar organizasaun exelénsia iha detesaun no kombate hasoru krime grave, kompleksu no organizadu, hodi kontribui ba sentidu seguransa sidadaun Timor-Leste nian.
PSIK nia asaun sira orienta hosi valór sira ne'ebé konsagra iha nia Kódigu Deontolójiku no Konduta, ne'ebé aprova hosi Diploma Ministeriál Nú. 42/2016, loron 27 fulan-Jullu. Instituisaun nia profisionál sira iha kompromisu atu haburas no promove prinsípiu sira umanizmu, justisa, integridade, onra, dignidade, imparsialidade, objetividade, probidade, no solidariedade. Valór sira-ne'e orienta aktu hotu-hotu servisu públiku nian, hodi garante katak funsaun ne'e ezerse ho rigor, respeitu ba ema, no konsiderasaun tomak ba direitu no liberdade sidadaun sira-nian, la haree ba sira-nia estatutu ka pozisaun prosesuál.
Haree iha detalle istória, organizasaun no enkuadramentu legál Polísia Sientífika ba Investigasaun Kriminál.
