9 de julho de 2026Sibercrime
Operasaun ne'ebé hahú iha tuku 20h30, rezulta ho detensaun ba sidadaun estranjeiru na'in-99, maioria ho nasionalidade xineza no kambodjana, ne'ebé daudaun ne'e detidu iha PCIC nia kustódia. Grupu ne'ebé envolve nia dimensaun boot liu duké investigasaun inisiál sira hatudu. Tanba razaun ne'e, durante asaun ne'e, ema na'in-19 konsege halai subar, ne'ebé daudaun ne'e autoridade sira buka hela.
Durante operasaun ne'e, aprende sasán tuirmai ne'e:
• komputadór desktop 88;
• komputadór portátil (laptop) 13;
• telemóvel 27;
• ekipamentu Starlink 3;
• osan iha moeda ho valór ne'ebé sei kalkula hela
Investigadór-xefe PCIC nian, Otávio da Costa Araújo, esklarese katak investigasaun la'o durante fulan ida antes konkretiza operasaun ne'e, no identifika grupu suspeitu ida ne'ebé alegadamente envolve iha atividade ilísita jogu online no burla informátika nian.
Investigasaun ne'e fó dalan ba ekipa operasionál atu identifika fatin ne'ebé alegadamente krime sira komete hela ba, no atu halo detensaun iha flagrante delitu.
Fatin ne'e, armazén ida, mantén nível seguransa aas, inklui sistema videovijilánsia (CCTV) atu monitoriza ema nia tama-sai no kontrolu asesu ba edifísiu ne'ebé restritu de'it ba ema sira ne'ebé lori kartaun identifikasaun espesífiku.
Investigasaun sira iha fatin ne'e fó dalan atu komprova katak maioria sidadaun estranjeiru sira ne'ebé detidu la iha sira-nia pasaporte rasik. Dokumentu sira ne'e iha terseiru sira nia liman, ne'ebé identifika ona no sei sai alvu ba detensaun.
Tuir investigasaun, rede ne'e suspeitu halo ona burla informátika hasoru vítima sira iha nasaun oioin, inklui Timor-Leste.
Ekipa investigasaun nian kontinua servisu atu identifika suspeitu sira no ema halai sira ne'ebé sei buka hela, halo inventáriu kompletu ba osan no ekipamentu ne'ebé aprende ona, no habukan liu tan dilijénsia sira ho objetivu atu identifika ema seluk ne'ebé posivelmente envolve iha rede kriminál ne'e.
PCIC garante katak ema hotu ne'ebé detidu no sasán ne'ebé aprende ona hela iha fatin seguru, no kompromete atu divulga iha tempu oportunu balansu finál no kompletu operasaun ne'e nian, inklui montante osan ne'ebé aprende ona.