19 de julho de 2026interpol
Suspeitu buka husi ekipa PCIC dezde kinta-feira, hodi monitoriza nia movimentu iha territóriu nasionál, to'o konfirma katak nia iha intensaun atu voa sai ohin ba estranjeiru. Kaptura mosu iha momentu suspeitu prontu ona atu sai husi rai.
Konforme notifikasaun Interpol nian, sidadaun sina ne'e, orijinariu husi rejiaun Nanbu, provínsia Sichuan, nia buka husi autoridade sina tanba suspeitu krime organiza prostituisaun, previstu iha artigu 358 kódigu penál sina nian, ho pena máximu prizaun laran-tomak.
Tuir investigasaun ne'ebé Polísia Seguransa Públika Chongqing halo, suspeitu ne'e integra, husi outubru 2023 to'o maiu 2024, grupu kriminozu ida nebe eksplora fatin prostituisaun ida iha Bangkok, Tailándia, ho lukru ilegál boot liu husi dólar amerikanu 150 mil.
Mandadu kaptura kontra suspeitu ne'e fó-sai iha dezembru 2024, depois husi nia sai klandestinamente husi Xina iha abríl tinan neba.
Depois husi kaptura, ohin, suspeitu ne'e transfere ona ba sela PCIC nian.
PCIC sei kontinua prosesu judisiál, hamutuk ho entidade kompetente sira, atu implementa prosedimentu legál nebe presiza, liu-liu kona-ba pedidu extradisaun ne'ebé bele mai husi autoridade sina.
PCIC hatutan fila-fali nia kompromisu ba kooperasaun ho Interpol no ho forsa polisiál internasionál sira seluk, iha luta kontra kriminalidade transnasionál, no sei kontinua servisu tuir mekanizmu kooperasaun jurídiku no polisiál internasionál nebe Timor-Leste sai parte.