18 de julho de 2026krime sibernétiku
Operasaun dahuluk akontese iha Hotel City 8, ne'ebé kaer ema na'in-33, no operasaun daruak iha Kuluhun, ne'ebé kaer tan ema na'in-19, hamutuk detidu na'in-52, sira hotu lori ba edifísiu PCIC, ne'ebé sira detidu iha-ne'ebá enkuantu prosesa autu kazu nian.
Kazu ne'e relasiona ho uzu alegadu Intelijénsia Artifisiál (IA) atu halo burla no fraude online, ne'ebé liga ho promosaun investimentu fiktísiu, no ne'ebé hakarak atinji vítima sira iha rai-liur Timor-Leste.
Durante operasaun ne'e, PCIC konfiska objetu oioin, inklui telefone, komputadór portátil no telemóvel no osan. PCIC agora sei prepara autu notísia nian atu submete ba Ministériu Públiku, enkuantu investigasaun komplementár sira la'o hela.
Primeiru-Ministru (PM), Kay Rala Xanana Gusmão, akompaña pesoalmente operasaun ne'e, no reafirma polítika toleránsia zero hasoru prátika atividade ilísitu sira iha Timor-Leste, inklui scam call centre, krime sibernétiku, lavajen osan, no atividade krime organizadu sira seluk.
Prezensa Xefe Governu nian, ne'ebé akompaña husi diretór nasionál PCIC, Vicente Fernandes e Brito, husi diretór SNI, Longuinhos Monteiro, no husi ekipa investigasaun PCIC nian, hatudu esforsu siriu no koletivu husi entidade Estadu no Governu nian iha kombate hasoru atividade ilísitu sira iha nasaun laran.